Працуючы ў адным з архіваў, сярод іншых матэрыялаў знайшоў цікавы дакумент – спіс абанентаў тэлефоннай сеткі, што абслугоўваліся Бераставіцкім аддзяленнем паштова-тэлеграфнай службы ў даваенны перыяд. Нагадаю, што карыстанне паслугамі тэлефоных сетак ў тыя часы было пакуль яшчэ рэдкай з’явай і адносна нятанна каштавала. У вёсках і невялікіх мястэчках тэлефоны мелі толькі адзінкі – асобныя дзяржслужачыя і нешматлікія заможныя жыхары. Знойдзены ў архіве спісак, складзены 1-га снежня 1933 г. кіраўніком Вялікабераставіцкага паштовага аддзялення Адольфам Дыбчакам для пастарунку мясцовай паліцыі. У ім фігуруюць 29 абанентаў. Адразу агаваруся, што дакумент напісаны ад рукі, таму некаторыя прозвішчы ў ім прачытаць складана. У сувязі з гэтым у артыкуле яны не прыводзяцца. Вось гэты спісак (з некаторымі каментарыямі і дадаткамі аўтара): 1) Касакоўскі Станіслаў, граф, уладальнік маёнтка Бераставіца; 2) Яцэвіч Антоні, уладальнік адзінай у Бераставіцы аптэкі; 3) Лэмпіцкі Зыгмунт, уладальнік фальварака Белы Дворак; 4) Біспінг Ян, уладальнік маёнтка Масаляны (да верасня 1939 г); 5) Багдановіч Вацлаў, Вялікабераставіцкі маёнтак Касакоўскіх (абслуга); 6) Яцуньскі Генрых, уладальнік фальварка Майкаўшчызна; 7) Малынічувна Яніна, настаўніца Бераставіцкай школы, праж.па вул. Дольнай, 9 (цяпер вул. Кастрычніцкая); 8) Язвіньскі Апалінар, уладальнік фальварка Зайкаўшчына, асаднік, афіцэр запасу войска польскага; 9) Завадзкі Францішак, фальварак Людвінаў; 10) Вышаліцкі Францішак, школа, Стары Дворац. Хаця Стары Дворац і не лічыўся вёскай (быў маёнткам), аднак тут знаходзіўся будынак пачатковай школы, дзе вучыліся дзеці з навакольных вёсак; 11) Пятроўскі Чэслаў, маёнтак Парфіноўцы (Пархімаўцы); 12) Станішэўскі Антоні, лясная служба, Вялікабераставіцкі маёнтак Касакоўскіх; 13) Адамкевіч Станіслаў, жыхар Бераставіцы, вул. Беластоцкая (цяпер Савецкая); 14) Касакоўскі Дамінік, бераставіцкі прыватны лекар, дом стаяў побач з галоўнай (рыначнай) пло-шчай мястэчка, недалёка ад таго месца, дзе сёння знаходзіцца будынак райвыканкама; 15) Мінкевічова Юзэфа, жыхарка Бераставіцы, вул. Дольная (Кастрычніцкая); 16) Чапліньская Яраслава, школа, Эймінаўцы; 17) Андрушкевіч Ян, жыхар Бераставіцы, вул. Беластоцкая (Савецкая); 18) Жак Хаім, жыхар Бераставіцы, прадстаўнік яўрэйскай абшчыны, вул Беластоцкая; 19) Праўленне Вялікабераста-віцкай гміны. Будынак яе знахо-дзіўся па вул. Школьнай (сёння Камсамольская, 8) з таго боку, дзе знаходзіцца царква; 20) Іцкін (імя напісана неразборліва), яўрэйскі купец, аптовы гандляр, праж. па вул. Хадкевічоўскай (Дзяржынскага); 21) Пухальскі Юзэф, паліцэйскі, праж.па вул. Ваўкавыскай; 22) Сідаровіч Пётр, паліцэйскі, праж. па вул. Дольнай; 23) Дарашкевіч Мікалай, жыхар Бераставіцы, вул. Канстытуцыі 3-га мая; 24) Боўшыц Фелікс, асаднік з ваколіцаў Бераставічанаў; 25) Ян (прозвішча абанента напісана неразборліва), з масалян-скага маёнтка Біспінгаў; 26) Юзэф (прозвішча неразборлівае), Вялікабераставіцкая школа; 27) Марыя (прозвішча наразборлівае), жыхарка вёскі Эймінаўцы; 28) Зыгмунт (прозвішча неразборлівае), асада Уладысін каля Бергеляў; 29) Адам (прозвішча неразборлівае), жыхар Бераставіцы, вул. Ваўкавыская. Зразумела, тэлефонныя апараты знаходзіліся і ў самым аддзяленні пошты, а таксама ў мясцовым пастарунку паліцыі. Сяргей Лушчык, г.Гродна