2018 год у Беларусі  аб’яўлены Годам малой радзімы. Для кожнага з нас важна ведаць гісторыю сваёй малой радзімы, яе культуры, людзей, якія працуюць побач. У Малабераставіцкай СШ адкрыццё Года малой радзімы адбылося ў выглядзе квэст-гульні “Мая Малая Бераставіца” , якая доўжылася на працягу ўсяго дня. Гульня праводзілася па станцыях. На першай станцыі “Апранайся па-беларуску” вучням трэба было на картках злучыць стрэлкамі рускую назву адзення з беларускай. З гэтым заданнем дзеці справіліся з лёгкасцю, так як ужо неаднаразова сустракаліся з гэтымі назвамі. Другая станцыя “Залатое кальцо Малой Бераставіцы” – экскурсія па аграгарадку з прыпынкамі каля аммбулаторыі, аўтамайстэрні, пошты, помніка воінам землякам. На кожным прыпынку іх чакалі цікавыя заданні: яны складалі прыказкі, адказвалі на пытанні, адгадвалі загадкі, чыталі вершы. На станцыі “Смачна есці” ў школьнай сталовай трэба было паказаць свае веды пра беларускія стравы і адабраць прадукты для прыгатавання дранікаў. Станцыя “Кветка пытанняў” патрабавала ад вучняў ведаў аб Малой Бераставіцы, аб яе мінулым і сучасным. Пятая станцыя мела назву “Беларуская хатка” і ўключала ў сябе наведванне аднайменнага раздзела ў народным гісторыка-краязнаўчым музеі “Вытокі”, дзе вучні адказвалі на пытанні экскурсаводаў. Вучні даведаліся шмат цікавага пра жыццё беларускіх сялян. “Час беларускай гульні” – такую назву мела апошняя станцыя. На ёй дзеці спаборнічалі ў беларускіх народных гульнях. За перамогу ў станцыях каманды атрымлівалі жэтоны, а ў канцы гульні – граматы. Квэст-гульня вельмі спадабалася дзецям. Яна дапамагла яшчэ раз звярнуць увагу на сваю малую Радзіму, сустрэцца з яе мінулым, яшчэ больш даведацца пра сучаснае, памарыць аб будучым. Таццяна Альшэўская, выхавацель групы падоўжанага дня Малабераставіцкай СШ