21 лютага ва ўсім свеце адзначаецца Міжнародны дзень роднай мовы. Гэтае свята, абвешчанае 17 лістапада 1999 года на 30-й сесіі ЮНЕСКА, накіравана на заахвочванне моўнай разнастайнасці і шматмоўнай адукацыі, падтрымку нацыянальных моў і культур, захаванне нацыянальнай адметнасці і самабытнасці, забеспячэнне права кожнага чалавека карыстацца роднай мовай і спрыяе ўсведамленню моўных і культурных традыцый, якія грунтуюцца на ўзаемаразуменні, цярпімасці і дыялогу.
Беларуская мова, як і гімн, сцяг, з’яўляецца найважнейшым атрыбутам нашай краіны. Яна ў значнай ступені садзейнічае фарміраванню нацыянальна адметнага аблічча нашай дзяржавы. Таму напярэдадні Міжнароднага дня роднай мовы ў Беларусі праводзіцца Тыдзень беларускай мовы і літаратуры.
У апошні час беларуская мова стала пранікаць у тыя сферы, дзе яе зусім не было гадоў 20 таму. Сёння беларуская мова прысутнічае ў інтэрнэце. Дзеці праводзяць шмат часу ў сацыяльных сетках проста, каб бавіць свой вольны час. Таму мы ў Старадварэцкай базавай школе вырашылі быць з вучнямі на адной хвалі і зрабіць так, каб час, праведзены ў інтэрнэце стаў для іх карысным. Падчас Тыдня беларускай мовы кожны дзень на старонцы школы ў інстаграм вучні будуць атрымліваць заданні, якія пашыраць іх кругагляд, падкрэсляць яшчэ раз прыгажосць роднай мовы, дадуць магчымасць прадэманстраваць свой творчы патэнцыял.
У Старадварэцкай базавай школе Тыдзень роднай мовы распачаўся ўрачыстай лінейкай, на якой быў агучаны план мерапрыемстваў. Затым вучні чыталі прозу, інсцэніравалі душэўны твор “На Каляды к сыну” Змітрака Бядулі, слухалі найпрыгажэйшую песню гурта “Дразды” “Беларуская мова”. А завяршылася адкрыццё Тыдня чытаннем уласных вершаў на беларускай мове настаўніка хіміі і біялогіі Зоі Уцепяргенавай.
На прапанову правесці ўрок роднай мовы адгукнулася трое вучняў. У панядзелак свой урок, поўнасцю распрацаваны ў дуэце са сваёй мамай, правёў Дзмітрый Міхалевіч, вучань 7 класа. Вучні 6 класа “настаўніка” ацанілі на высокім узроўні. Цяпер Дзмітрый падумвае аб выбары прафесіі на карысць роднай мовы.
Другі хлопчык, Мікіта Чаргейка, вучань 7 класа, прыйшоў на кансультацыю да настаўніка беларускай мовы і літаратуры са сваімі арыгінальнымі ідэямі. Яго ідэям можа пазайздросціць нават вопытны педагог.
Прыемна тое, што да правядзення Тыдня роднай мовы далучыліся па ўласнай ініцыятыве не толькі настаўнікі-філолагі: класны кіраўнік 7 класа правядзе для вучняў рухомыя перапынкі з беларускімі гульнямі, бібліятэкар – інтэрактыўную гульню, бацькі дапамогуць стварыць сваім дзецям арыгінальную закладку.
У праграме Тыдня шмат цікавага і пазнавальнага. Чакаем ад кожнага класа касплэй на любімы твор, інтэрв’ю з вучнямі і педагогамі на тэму “Любімы пісьменнік і твор на мове роднай”, фотачэлендж “Я чытаю” і многае іншае.
Беларуская мова сёння модная. Вучні Старадварэцкай базавай школы за модай сочаць, таму мову родную шануюць, любяць і паважаюць.
Аксана ДЗЯМІДЗІК, арганізатар Тыдня роднай мовы, настаўнік беларускай мовы і літаратуры Старадварэцкай базавай школы
