Чарговы выпуск у школе мастацтваў

26 мая Бераставіцкая дзіцячая школа мастацтваў развітвалася са сваімі выпускнікамі. Пасведчанні аб заканчэнні школы сёлета былі ўручаны 21 выпускніку музычнага аддзялення. Прыгожыя, узрушаныя, шчаслівыя яны не шкадавалі цёплых слоў для сваіх настаўнікаў і стараліся як мага лепш паказаць свае музычныя здольнасці і ўменні на справаздачным канцэрце. Парадавалі прысутных у зале і лепшыя вучні школы, музычныя нумары ў іх выкананні таксама гучалі ў справаздачным канцэрце.
Гэты навучальны год выдаўся для школы даволі паспяховым. Як сказала ў сваім выступленні дырэктар І.А.Баер, навучэнцы школы дэманстравалі свае ўменні на конкурсах і фестывалях розных узроўняў. Дастойна прадставіла школу мастацтваў на адборачных турах міжнароднага конкурсу “Масты надзей” і рэспубліканскай алімпіяды па музычна — тэарэтычных дысцыплінах Алеся Гарбуз, паспяхова вы-ступіў на міжнародным фестывалі “Сярэбраны звон цымбалаў” Глеб Затаўка, работа навучэнца мастацкага аддзялення Аляксандра Бандарыка атрымала прыз сімпатый гледачоў на рэспубліканскім конкурсе дзіцячага малюнка “Чарнобыль: мінулае, сучаснасць, будучыня”. Гэтыя вучні атрымалі за свае дасягненні граматы і каштоўныя падарункі.
Пахвальныя лісты за выдатную вучобу былі ўручаны Вікторыі Сацура, Надзеі Рыгосік, Івоне Ігнатовіч і Караліне Ігнатовіч.
Шэраг вучняў атрымалі граматы за добрую вучобу і актыўны ўдзел у жыцці школы.
А тое, што музычнае жыццё школы мастацтваў насычанае, не падлягае ніякаму сумненню. Гэта і конкурс “Юныя таленты”, які праводзіцца з мэтай выяўлення патэнцыяльных удзельнікаў абласных і рэспубліканскіх конкурсаў і фестываляў, і канцэртныя праграмы, музычныя кампа-зіцыі, выступленні ўзорных харавых калектываў “Манжарок” і “Кампанэллі”, узорнага духавога аркестра “Тuttі”. Рад тэматычных выстаў былі арганізаваны навучэнцамі мастацкага аддзялення пад кіраўніцтвам А.Ф.Втарушына. Дарэчы, выстава “Вясна так доўгачаканая” была прадстаўлена ў фае школы мастацтваў і ў гэты дзень.
Выпускнікі развіталіся са школай, чарговы навучальны год закончыўся, але канцэртная дзейнасць дзіцячай школы мастацтваў будзе працягваецца і летам.
Ірына МІКЛАШ