У Музеі Вавёркі ў Вялікай Бераставіцы працуе выстава вышыванак “Творы жаночых рук”

Выстава вышыванак пад назвай “Творы жаночых рук” была арганізавана напярэдадні Дня жанчын у Музеі Вавёркі ў Вялікай Бераставіцы.
На ёй прадстаўлены аўтарскія работы майстрыхі-сучасніцы з горада Гродна Галіны Хайноўскай, а таксама вышыванкі майстрых з раёна — Ніны Андрушэвіч, Ніны Хамко, Надзеі Кобрынец і некаторых іншых.
— Сёння мастацтва вышыўкі, — гаворыць супрацоўнік музея Яўген Волкаў, — карыстаецца асаблівай папулярнасцю ў многіх майстрых. Некалі яно насіла выключна бытавы характар, а з цягам часу ператварылася ў адно з самых распаўсюджаных хобі. Вышыўка – гэта не толькі прыгажосць, створаная для душы, але і выдатная магчымасць зразумець звычаі таго ці іншага народа, пазнаёміцца з яго культурай і каштоўнасцямі.
Асаблівую ўвагу прыцягваюць пры наведванні выстаўкі работы Галіны Хайноўскай. Некаторыя з іх яна выконвала на працягу некалькіх месяцаў, а над стварэннем рэпрадукцыі карціны “Тайная вячэра” Леанарда да Вінчы майстрыха працавала цэлы год. У вышыўцы яе выкарыстана 156 колераў і адценняў. На працягу паўгода стваралася рэпрадукцыя партрэта М.І. Лапухіной, прадстаўніцы графскага роду Талстых, аўтарам якой быў вядомы мастак В.Л. Баравікоўскі. У гэтым вышываным творы налічваецца 65 колераў і адценняў. Такая ж каляровая гама і ў абразе Казанскай Божай Маці.
Супрацоўнікі музея сардэчна запрашаюць наведаць цікавую выстаўку, якая працягнецца да канца сакавіка.
Сяргей Хілюта, фота аўтара