Цікавая сустрэча адбылася ў Макараўскім яслях-садзе-сярэдняй школе ў рамках інфармацыйна-адукацыйнага праекту “ШАГ” па тэме “Ганаруся сваімі славутымі землякамі”. У госці да навучэнцаў прыйшоў ганаровы грамадзянін Бераставіцкага раёна, заслужаны работнік КСУП “Макараўцы” Рышард Аўдзей.
У час сустрэчы Рышард Іосіфавіч расказаў дзецям аб сваёй працоўнай дзейнасці, аб тым, як паступова крочыў па прыступках поспеху, як заваёўваў аўтарытэт сярод аднавяскоўцаў, аб тым, як бацькі з самага дзяцінства прывівалі працавітасць, любоў да сваёй роднай зямлі, да свайго краю. Пра Рышарда Іосіфавіча можна сказаць “Дзе нарадзіўся, там і спатрэбіўся”. І гэта сапраўды так, таму што ўсё жыццё, уся працоўная дзейнасць яго звязана з макараўскай зямлёй.
У час адкрытага дыялогу навучэнцы вялі размову аб дзяржаўных узнагародах, аб прэміі “За духоўнае адраджэнне”, аб людзях, якія ўдастоены высокага звання “Герой Беларусі”. Валанцёры атрада “Данка” разважалі аб валанцёрскай дзейнасці, аб дабрачынных акцыях, якія праводзяцца ва ўстанове адукацыі.
Навучэнцы падрыхтавалі паведамленні аб людзях, якія ўнеслі свой уклад у духоўнае адраджэнне нашай малой радзімы. Спыніліся на тым, што і на нашай бераставіцкай зямлі ёсць лаўрэат прэміі “За духоўнае адраджэнне” — гэта Мікалай Пацэнка. Мікалай Іванавіч — краязнаўца, рэдактар-складальнік кнігі «Памяць. Бераставіцкі раён», навуковы супрацоўнік дзяржаўнай установы культуры “Музей Вавёркі ў Вялікай Бераставіцы”, ганаровы грамадзянін Бераставіцкага раёна.
Час праляцеў незаўважна, і трэба было расставацца. Такія цёплыя сустрэчы надоўга застануцца ў памяці кожнага навучэнца. Спадзяёмся, што і нашы навучэнцы вырастуць дастойнымі грамадзянамі сваёй краіны.
Алена Будніцкая, намеснік дырэктара па выхаваўчай рабоце Макараўскага ясляў-сада – сярэдняй школы
