У Бераставіцкай райветстанцыі адбыўся раённы семінар-нарада па ветэрынарыі

Ветэрынарыі належыць важнае месца ў нашым жыцці. Людзі гэтай высакароднай прафесіі не толькі стаяць на варце здароўя жывёлы, але і чалавека. Яны не дапускаюць небяспечных эпізаатычных сітуацый, кантралююць, каб прадукцыя жывёлагадоўлі была бяспечнай для здароўя дарослых і дзяцей. У Бераставіцкай райветстанцыі 23 кастрычніка адбыўся раённы семінар-нарада па ветэрынарыі з удзелам намесніка начальніка ўпраўлення сельскай гаспадаркі і харчавання райвыканкама Паўла Буткевіча і галоўных ветурачоў гаспадарак. Мэтай мерапрыемства было далейшае эфектыўнае развіццё жывёлагадоўлі на Бераставіччыне.
Жывёлагадоўля – важная галіна аграрнага сектара, значны рэзерв умацавання эканомікі. У многіх у нас карані ў вёсцы, мы ведаем, як нялёгка было дагледзець нават адну карову, каб яна не хварэла і добра даілася. А ў калектыўных гаспадарках вялікі статак, рызыка захворванняў жывёлы ўзрастае ў шмат разоў. На дапамогу людзям прыходзяць сучасныя эфектыўныя тэхналогіі, парушаць якія нельга. Гэта навукова абгрунтаваныя строгія правілы, якія гарантуюць поспех. Але работа ў жывёлагадоўлі – гэта справа не аднаго дня, яна павінна быць добра наладжанай. Разам усе звёны вытворчага працэсу павінны працаваць, як адзіны механізм.
На раённай нарадзе ўзды­малі­ся пытанні санітарыі на жывёлагадоўчых аб’ектах, прафілактыкі захворванняў жывёлы, захаванасці маладняку, падрыхтоўкі да абласнога семінара, які запланавана правесці на базе нашага раёна ў лістападзе. Прафілактыка, безумоўна, заўсёды каштуе менш, чым лячэнне. Лепш засцерагчыся, чым потым мець праблемы. Жывёлагадоўчыя аб’екты павінны быць надзейна агароджаны. Не сакрэт, што дагэтуль бывае так, што агароджа вакол фермы ахайная і прыгожая, а падсыпка знізу не зроблена, так што на тэрыторыю могуць, напрыклад, трапіць лісы, бадзяжныя каты і сабакі, якія разносяць небяспечнае захворванне – шаленства. Праверыць, як у іх абстаяць справы, у інтарэсах саміх жывёлаводаў. Афрыканская чума свіней па-ранейшаму стварае пагрозу. Праблему гэтую трэба пастаянна трымаць у полі зроку. У буфернай зоне каля свінакомплексаў і свінаферм нельга трымаць свіней. Сітуацыю трэба прымаць пад пільным кантролем. Каб не было ніякіх нечаканасцей, лепш надаваць увагу своечасоваму папярэджванню небяспечных сітуацый.
Уздымалася на семінары і важнае пытанне захаванасці маладняку. Ветурачы не толькі лечаць жывёлу, яны супрацоўнічаюць з іншымі службамі сельгаскааператываў, дапамагаюць кваліфікаванымі кансультацыямі працаўнікам. Якасць кармоў, стан капытоў буйной рагатай жывёлы і многія іншыя пытанні былі ў полі зроку спецыялістаў у час раённай нарады. Закраналася ў час мерапрыемства і актуальнае пытанне павышэння якасці малака. Добры прыклад паказвае СВП “АграМір”. Раней тут таксама былі праблемы, зараз людзі стараюцца. Сучасная формула поспеху – гэта новыя тэхналогіі і “чалавечы фактар”.
Гутарка са спецыялістамі вялася ў канструктыўным рэчышчы. Безумоўна, работа ветэрынарных службаў гаспадарак вельмі няпростая і напружаная. Калі нешта не атрымліваецца, намеснік начальніка ўпраўлення сельскай гаспадаркі і харчавання райвыканкама Павел Буткевіч і галоўны ветурач раёна Аляксандр Баброў прапанавалі сваю дапамогу. Сіла – у супрацоўніцтве, нашым аграрыям па плячу важныя задачы.
Ніна Наддэ,
фота аўтара