З 4 па 8 жніўня ў Беларусі праходзіць датэрміновае галасаванне на выбарах Прэзідэнта Рэспублікі Беларусь. У гэтыя дні ўсе, хто не можа па тых ці іншых прычынах прыйсці на ўчасткі ў асноўны дзень галасавання, 9 жніўня, маюць магчымасць зрабіць свой выбар. Скарысталіся гэтым правам і многія з бераставічан.
У пятніцу, 7 жніўня, мы наведалі Старадварэцкі ўчастак для галасавання №12 і Пархімаўскі ўчастак для галасавання №11, каб паглядзець, як там арганізавана датэрміновае галасаванне.
— На нашым участку датэрміновае галасаванне праходзіць зладжана і спакойна, заўваг да работы ўчастковай камісіі ў нас няма, — адзначылі назіральнікі, якія працуюць на Старадварэцкім ўчастку для галасавання №12. – Дарэчы, выбаршчыкі прыходзяць даволі актыўна.
— Я заўсёды ўдзельнічаю ў кожнай выбарчай кампаніі, лічу гэта сваім грамадзянскім абавязкам, — гаворыць жыхар аг. Стары Дворац Багдан Апазнанскі. – Цяпер гарачая пара ў вясковых жыхароў, у выхадныя дні будзе шмат працы, вось і вырашыў прагаласаваць датэрмінова.
— А я думаю на выхадныя паехаць у Гродна да дачкі, дык вось і скарыстаўся магчымасцю прагаласаваць тады, калі маю вольны час, — адзначае яшчэ адзін выбаршчык з гэтага ўчастка Уладзімір Таболіч. – Лічу, што і мой голас важны, асабліва цяпер, калі мы выбіраем кіраўніка краіны.
У спісках выбаршчыкаў Пархімаўскага ўчастка для галасавання №11 больш за 450 чалавек, і ўжо практычна чвэрць з іх зрабілі свой выбар. Як адзначылі на ўчастку, прычынамі, з-за якіх грамадзянін вырашыў прагаласаваць датэрмінова, члены камісіі не цікавяцца – гэта асабістая справа кожнага.
На ўчастку асаблівую ўвагу звяртаюць на тых выбаршчыкаў, якія будуць галасаваць упершыню — іх тут зарэгістравана 5 чалавек. Для іх падрыхтаваны невялікія сімвалічныя падарункі, каб гэты дзень маладым людзям абавязкова запомніўся. Дарэчы, адна з іх – Анастасія Матыс, малады спецыяліст мясцовай гаспадаркі, ужо прагаласавала датэрмінова і атрымала віншаванні ад старшыні ўчастковай камісіі Аксаны Аўдзітоўскай.
— На выбары я хаджу заўсёды, лічу, што выбары Прэзідэнта Рэспублікі Беларусь – вельмі важная падзея для ўсіх нас, — кажа Наталля Дзегцяронак, якая прыйшла на ўчастак для галасавання са сваёй унучкай Веранікай.
— Мы вельмі перажываем за будучыню сваіх дзяцей, за Беларусь, таму абавязкова ідзём галасаваць. Я працую аператарам машыннага даення, у мяне ў нядзелю працоўны дзень, таму вырашыла аддаць свой голас заранёў,
Прагаласаваць датэрмінова вырашыла і Алена Сакалоўская з сынам Сямёнам.
— Прыйшлі разам з сынам, ён вельмі хацеў сам апусціць бюлетэнь у ўрну, але вось бачыце, засаромеўся павышанай увагі да яго, — усміхаецца жанчына. – Я лічу, што трэба вучыць дзяцей грамадзянскай актыўнасці з малых гадоў.
Датэрміновае галасаванне працягнецца яшчэ заўтра, 8 жніўня. Участкі для галасавання ў гэты дзень будуць працаваць з 10.00 да 14.00 і з 16.00 да 19.00 гадзін. 9 жніўня, у асноўны дзень галасавання, яны будуць адкрыты з 8.00 да 20.00 гадзін.
Ірына МІКЛАШ, фота аўтара
