Мяняюць свой выгляд нашы краявіды. Жоўценькая роўная шчотачка застаецца на збожжавых палях Бераставіччыны, калі там пройдзецца дагледжаная тэхніка, і клапатлівыя рукі аграрыяў дачыста збяруць чарговы каштоўны дар роднай зямлі.
Нягледзячы на спёку, якая паўплывала-такі на ўраджай гэтага года, аддача ад намаганняў хлебаробаў будзе. Упэўніцца ў гэтым можна было ў СВК “Пархімаўцы”. Восем магутных камбайнаў працавала на ўборцы ўчора ў гэтым сельгаскааператыве. Тут моцная агранамічная служба, дружная каманда працаўнікоў.
Надвор’е ў панядзелак выдалася сонечнае, добрае, таму і работа на полі кіпела. На магутным камбайне “Палессе-1218” яравы ячмень малацілі старшы камбайнер Віктар Маслоўскі і камбайнер Пётр Бычкоўскі. Абодва яны на жніве далёка не навічкі, а разам утвараюць зладжаны тандэм. Разумеюць прафесіяналы адзін аднаго з паўслова, а настрой у іх бадзёры і ад таго, што работа іх важная, кожнаму з нас патрэбная. Будзе хлеб – будзе і сіла, гаварылі ў народзе.
Рапс тут даў звыш 45 цэнтнераў з гектара, у мінулым годзе было 54. Ураджайнасць добрая і леташняя, і тая, што ў гэтым годзе. А ячмень, які ў СВК “Пархімаўцы” малацілі ўчора чацвёрты дзень, дае 76 цэнтнераў з гектара. Убраць “вусатую культуру” трэба на 245 гектарах.
Пры добрым надвор’і, без дажджоў, мяркуюць у гэтай гаспадарцы, спатрэбіцца прыкладна 10 дзён, каб убраць збожжавыя.
Жніўны канвеер упэўнена крочыць па Бераставіччыне. Добрага спрыяльнага вам надвор’я, поўных багатых “куфраў” збожжа, шаноўныя землякі!
Ніна Наддэ,
фота аўтара
Четверг, 19.12.2024
