“Усмешка Дзяцінства” — пад такой назвай 30 мая на адкрытай пляцоўцы летняга амфітэатра ў Вялікай Бераставіцы прайшло раённае свята да Міжнароднага дня абароны дзяцей.
Яно стала прыемным падарункам маленькім жыхарам гарадскога пасёлка і дэлегацыям з усіх навучальных устаноў раёна, якія таксама прынялі ўдзел у мерапрыемстве.
Адкрыў святочную праграму намеснік старшыні райвыканкама Сяргей Чыкун, які павіншаваў хлопчыкаў і дзяўчынак з Міжнародным днём абароны дзяцей і з пачаткам летніх канікулаў, якія адкрывае гэтае цудоўнае свята, пажадаў ім прыемнага і бяспечнага адпачынку.
Ад раённага выканаўчага камітэта Сяргей Ягоравіч уручыў памятныя падарункі лепшым вучням раёна – пераможцам і ўдзельнікам разнастайных раённых і школьных конкурсаў, аглядаў і спартыўных спаборніцтваў. Салодкія пачастункі былі падрыхтаваны таксама для кожнай дэлегацыі і ўдзельнікаў конкурснай праграмы.
Шмат прыемных уражанняў у маленькіх гасцей свята пакінуў і канцэрт, які быў насычаны яркімі і цікавымі нумарамі, цудоўны настрой падарылі разнастайныя гульні, якія праводзілі з дзецьмі казачныя героі.
Затым забаўляльная праграма працягнулася на тэматычных пляцоўках, якія падрыхтавалі раённы аддзел унутраных спраў, дзіцячая бібліятэка, раённы аддзел па надзвычайных сітуацыях і аддзяленне ААТ “Белаграпрамбанк” у Бераставіцы. Арганізатары тэматычных пляцовак таксама праводзілі з дзецьмі разнастайныя віктарыны, конкурсы, гульні, уручалі прызы і сувеніры.
Вялікае захапленне, асабліва ў хлопчыкаў, выклікалі пляцоўкі раённага аддзела па надзвычайных сітуацыях і РАУС, на якіх была прадстаўлена службовая тэхніка, абсталяванне, сродкі аховы і службовая форма. У кожнага была магчымасць прымераць касцюмы выратавальнікаў, у якіх яны змагаюцца з агнём і іншымі стыхійнымі з’явамі, пасядзець за рулём пажарнай машыны.
Дапаўнялі атмасферу свята ўсімі любімыя атракцыёны і гандлёвыя кропкі з разнастайнымі цацкамі, салодкай ватай, поп-корнам і іншымі прысмакамі, якія так падабаюцца дзецям.
Закончылася свята вясёлай дзіцячай дыскатэкай.
Ірына МІКЛАШ,
фота аўтара
