СВК “Алекшыцы” павялічыў валавы надой малака

У СВК “Алекшыцы” няма сезонаў “вялікага малака”, калі кароў вясной выпускаюць на зялёную пашу і надоі ад свежай травы імкліва растуць. Жывёла тут знаходзіцца на круглагадовым стойлавым утрыманні па новых тэхналогіях, аднатыпным кармленні, і такая сістэма сябе апраўдвае. Паказчыкі красамоўна сведчаць пра гэта – за 4 месяцы гэтага года валавы надой склаў 2679 тон, а за такі ж перыяд мінулага года было 2468. Рост дасягнуў 108,5 працэнта, што вельмі радуе.
За кошт чаго дасягнуты такі поспех? Падмуркам яго стала добрая кармавая база. Кармы тут кожны год нарыхтоўваюцца добрай якасці і ў дастатку. Суадносіны сенажу і сіласу пры кармленні кароў належныя, да таго ж у сельгаскааператыве закупляюць сланечнікавы шрот, рапсавую макуху і іншыя карысныя дабаўкі, каб правільна збалансаваць рацыёны для розных груп жывёлы. Для высокапрадуктыўных кароў “меню” разлічваецца згодна з фізіялогіяй, каб задаволіць патрэбы арганізму.
На малочнатаварным комплексе “Алекшыцы” даенне трохразовае, на ферме “Падбагонікі” кароў дояць два разы. На гэтай невялікай ферме ў 2012 годзе зрабілі добрую рэканструкцыю. Аб’ект сапраўды не пазнаць! Тут заасфальтавалі тэрыторыю, пабудавалі яшчэ адзін будынак, замянілі транспарцёры, малакаправод, зрабілі малочны блок, устанавілі 6-тонны халадзільнік. Паклапаціліся і пра людзей. На ферме ёсць душавая, пральная машына для мыцця спецадзення, утульны бытавы пакой, дзе можна папіць гарачага чаю, трошкі адпачыць. Аператары машыннага даення Хіджран Казінец, Алена Гіжук, Данута Сівуха, Людміла Сіўцова і падменная Алена Сіцько добра ведаюць сваю справу. У іх залатыя рукі, яны любяць жывёлу, вельмі стараюцца. Сярэднясутачны надой зараз на гэтай рэканструяванай ферме 23 кілаграмы, як на лепшых комплексах у рэспубліцы. Можна ад душы парадавацца за людзей.
А ў той дзень, калі я тут пабывала, галоўны ветурач СВК “Алекшыцы” Уладзімір Белы як раз займаўся абрэзкай капытоў кароў, а даглядчык жывёлы Іван Богуш (на здымку) яму дапамагаў. Станок зараз ёсць свой, гэта і зручна, і больш эканомна. Уладзімір Альфонсавіч авалодаў гэтым майстэрствам, любіць жывёлу і ўвогуле ён нераўнадушны да агульнай справы чалавек, стараецца, каб жывёлагадоўля дынамічна развівалася.
Дзякуючы такім людзям, якія працуюць дружнай камандай, работа спорыцца. Па плячу ім і новыя здабыткі.
Ніна Наддэ,
фота аўтара