Наперадзе – працоўнае лета

Лета – гэта не толькі перыяд аздараўлення і адпачынку. Мно­гія маладыя людзі разлічваюць правесці час канікул з максімальнай карысцю, адчуць сябе больш самастойнымі і зарабіць свае ўласныя грошы. Такую магчымасць ім дасць праца ў студэнцкіх атрадах, вучнёўскіх брыгадах, лагерах працы і адпачынку, а таксама індывідуальнае працаўладкаванне на перыяд летняга адпачынку.
Да летніх канікул застаецца ўжо не так многа часу, і каб даве­дацца, як ідзе падрыхтоўка да пра­цоўнага семестра, я звярнулася да тых, хто непасрэдна займаецца арганізацыяй другаснай занятасці моладзі.
Аддзел па працы і занятасці ўпраўлення па працы, занятасці і сацыяльнай абароне райвыканкама ўжо вядзе актыўную работу па пошуку працоўных месцаў для арганізацыі другаснай занятасці моладзі. Як паведаміла начальнік аддзела Ірына Васільева, ужо з 15 мая прыступіць да працы першая вучнёўская брыгада ў колькасці сямі чалавек, якая будзе працаваць на добраўпарадкаванні аддзялення кругласутачнага прабывання грамадзян сталага ўзросту і інвалідаў у аг.Алекшыцы.
У летні перыяд будзе аргані­завана праца яшчэ чатырох вуч­нёўскіх брыгад, фінансуемых са сродкаў Фонду сацыяльнай абароны насельніцтва. Ужо заключаны дагаворы на работу брыгад на базе Массалянскага ясляў-сада-БШ (17 чалавек), Макараўскага ясляў-сада-СШ (10 чалавек), Ка­ню­хоўскага ясляў-сада-СШ (13 чалавек) і Алек­шыцкай СШ (10 чалавек). Школьнікі, занятыя ў гэтых брыгадах, будуць працаваць на добраўпарадкаванні тэ­ры­то­рыі сваёй установы адукацыі і падрыхтоўцы яе да новага навучальнага года.
Што датычыцца індывідуаль­нага працаўлад­кавання моладзі, адзначыла Ірына Алегаўна, то ёсць і такая магчымасць. Некаторыя арганізацыі і прадпрыемствы раёна гатовы прыняць школьнікаў і студэнтаў на час летніх канікул. Напрыклад, ААТ “Бераставіцкая ПМК-141” можа працаўладкаваць паўналетніх маладых людзей на падсобныя работы, Бераставіцкі камбінат бытавога абслугоўвання насельніцтва – у цэх жалеза-бе­тонных вырабаў. Бераставіцкі філіял аблспажыўтаварыства пра­­па­­нуе вакансіі прадаўцоў на вы­насным гандалі, на падмене водпускаў прадаўцоў, аператараў ЭВМ, прыбіральшчыкаў службо­вых памяшканняў. Праўда, на ўсе гэтыя вакансіі, за выключэннем прыбіральшчыкаў службовых па­мяшканняў, таксама патрабуюцца маладыя людзі, якім ужо споўнілася 18 гадоў.
Непаўналетнія падлеткі могуць знайсці працу ў сельскагаспадар­чых арганізацыях раёна, пераважна гэта відавая праполка, а таксама работа ў садзе (СВП “АграМір”). На ўборку зерневых і работу на зернетаках будуць прымаць толькі паўналетніх маладых людзей.
Для школьнікаў ёсць магчы­масць летам папрацаваць у ла­ге­рах працы і адпачынку. Па словах метадыста аддзела аду­кацыі райвыканкама Інесы Сайко, такія лагеры карыстаюцца папулярнасцю ў падлеткаў, маладыя людзі ў іх не толькі працуюць і зарабляюць грошы, але і праходзяць аздараўленне. Гэтым летам будзе дзейнічаць два лагеры працы і адпачынку – на базе Малабераставіцкай СШ і гімназіі аг.Пагранічны. Па дваццаць чалавек у кожным лагеры будуць працаваць на палетках СВК “Малабераставіцкі элітгас” і “Цецяроўка”.
Займаецца арганізацыяй дру­­га­снай занятасці моладзі і раё­н­ны камітэт Беларускага рэспуб­ліканскага саюза моладзі. Як расказала першы сакратар РК ГА “БРСМ” Ірына Крывапляс, ужо заключаны дагавор на пра­цу педагагічнага атрада ў дзіця­чым аздараўленчым лагеры “Бе­ра­ставіцкі” на першую змену ў колькасці 15 чалавек, плануецца таксама, што педагагічны атрад будзе дзейнічаць і падчас другой і трэцяй змены.
Цяпер у раённым камітэце БРСМ вядзецца рэгістрацыя жадаючых знайсці працу на час летніх канікул, маладыя людзі могуць таксама звяртацца ў аддзел па працы і занятасці ўпраўлення па працы, занятасці і сацыяльнай абароне райвыканкама або прама да наймальнікаў у тыя арганізацыі, дзе чакаюць моладзь.
Ірына Міклаш