“Лічбы – гэта цікава,”- так гаворыць пра сваю прафесію бухгалтар РУСП “Масаляны” Юлія Навакоўская. У яе ўласны погляд на такі няпросты занятак, які яна выбрала па прызванні. І сапраўды, пра прафесію бухгалтара зусім незаслужана склалася ўстойлівае меркаванне, што тут прыходзіцца мець справу з сухімі лічбамі, і таму гэта … сумна. Гуманітарый наўрад ці выбера такі складаны для сябе занятак. А вось чалавек, які любіць дакладныя навукі, знойдзе тут і рамантыку, і прыгажосць.
Не толькі мама Юлі – бухгалтар — аказала рашаючы ўплыў на яе выбар, але і ўласныя схільнасці і здольнасці. Яны праявіліся ўжо тады, калі яна вучылася ў сярэдніх класах школы. Дзяўчынка любіла матэматыку, фізіку, хімію.
— А напісаць сачыненне для мяне было кожны раз складанай задачай, — прызнаецца Юлія. – Усе дакладныя прадметы ж, наадварот, даваліся лёгка.
— Але ў іх усё грунтуецца на лічбах, формулах. Многае трэба проста вучыць, запамінаць. Няўжо там можна ўбачыць нешта рамантычнае? – спыталася я.
— Безумоўна, — упэўнена адказала субяседніца. – Лічбы – гэта цікава, прыгожа, стройна. Яны ствараюць сістэму, якая адлюстроўвае рэальную карціну. Мне гэта падабаецца.
Дзяўчына ў мінулым годзе закончыла Гродзенскі гандлёвы каледж, зараз завочна вучыцца ў аграрным універсітэце. Яна добрым словам успамінае сваю сярэднюю спецыяльную навучальную ўстанову. Там не толькі далі ёй грунтоўныя прафесійныя веды, але і шмат паспрыялі агульнаму развіццю асобы. У вольны час арганізоўваліся культпаходы ў тэатр, цікавыя сустрэчы, розныя мерапрыемствы.
— Не захацелася застацца ў Гродне назаўсёды?
— Не. Горад – гэта не маё. Мяне ён напружвае. Я больш люблю вёску. Тут вырасла, тут і жыць, і працаваць хачу, — адказала Юля.
Мне вельмі падабаецца такі светапогляд маладога спецыяліста. Менавіта такая сучасная моладзь, адукаваная, упэўненая ў сабе, патрэбна нашай беларускай вёсцы, яна — дастойная змена старэйшаму пакаленню.
— А што Вам падабаецца з прадметаў у аграрным універсітэце? Што Вам цікава? – пытаюся далей.
— Многія прадметы, але ў першую чаргу эканоміка, — расказвае субяседніца. — Выкладчыкі змястоўна і цікава пра ўсё расказваюць. Напрыклад, каб эканоміка развівалася, узровень жыцця людзей павышаўся, вельмі важныя інвестыцыі, сучасная мадэрнізацыя вытворчасці. Чым больш інвестыцый мы прыцягнем, тым лепш. Жыццё не стаіць на месцы, трэба ісці ў нагу з часам.
Ніна Наддэ, фота аўтара
