Традыцыйна напачатку новага навучальнага года падводзяцца вынікі ўступнай кампаніі ў вышэйшыя і сярэднія спецыяльныя навучальныя ўстановы. Аб тым, у якім статусе распачалі гэты навучальны год выпускнікі Бераставіцкага раёна, я пацікавілася ў аддзеле адукацыі, спорту і турызму райвыканкама.
– Сёлета ўстановы адукацыі раёна закончылі 84 адзінаццацікласнікі, базавую адукацыю атрымалі 200 вучняў дзявятых класаў, — паведаміла метадыст аддзела адукацыі, спорту і турызму райвыканкама Наталля Лапінская. – Студэнтамі вышэйшых навучальных устаноў сталі 57 выпускнікоў сярэдніх школ раёна (68%). 45 з іх паступілі на бюджэтную форму навучання, 12 будуць атрымліваць адукацыю за кошт уласных сродкаў. Адна з выпускніц выехала на вучобу за мяжу, яна будзе вучыцца ў медыцынскім універсітэце ў Кракаве (Рэспубліка Польшча).
Яшчэ 21 адзінаццацікласнік паступіў у сярэднія спецыяльныя навучальныя ўстановы (16 – на бюджэтную форму навучання, 5 – на платную), 6 – у прафесійна-тэхнічныя.
Што датычыцца былых дзявяцікласнікаў, то, па словах Наталлі Лапінскай, 107 з іх працягваюць навучанне ва ўстановах агульнай сярэдняй адукацыі (101 – у школах нашага раёна, 3 – у ліцэі №1 г.Гродна, 2 – у Вярэйкаўскай СШ, 1 – у СШ №1 г.п.Рось). 53 выпускнікі базавай школы паступілі ў сярэднія спецыяльныя навучальныя ўстановы (47 – на бюджэтную форму навучання, 6 – на платную), 40 чалавек будуць атрымліваць прафесійна-тэхнічную адукацыю.
Калі гаварыць аб найбольш папулярных спецыяльнасцях, то выпускнікі сярэдняй школы аддалі перавагу педагагічным – на іх паступіла 13 чалавек, 11 выбралі сельскагаспадарчы накірунак, па 9 – медыцынскі і эканамічны.
Найбольшая колькасць дзявяцікласнікаў паступіла ў навучальныя ўстановы сельскагаспадарчага профілю — 25 чалавек, 19 выпускнікоў базавай школы будуць атрымліваць педагагічную адукацыю, 5 – эканамічную.
Ірына Міклаш
