Добрыя гаспадары РУСП “Масаляны”

РУСП “Масаляны” – адна з самых моцных гаспадарак на Бераставіччыне, якая вылучаецца адметным “чалавечым фактарам”. Дзякуючы прадуманаму стымуляванню зацікаўленасці людзей у павышэнні эфектыўнасці працы і агульнага дабрабыту, тут з кожным годам умацоўваецца вытворчы працэс. Стабільнасць і ўпэўненасць у заўтрашнім дні ў сённяшніх няпростых умовах “дарагога каштуе”, і ў РУСП “Масаляны”, безумоўна, гэта ёсць.
У лічбах, як у люстэрку, можна ўбачыць рэальную эканамічную сітуацыю ў гаспадарцы. У гэтым годзе, напрыклад, апраўдвае чаканні выгадная культура – цукровыя буракі, якіх плануюць тут здаць на 3000 тон больш, чым летась. У мінулым годзе прадалі дзяржаве 12000 тон запатрабаванай салодкай сыравіны, што пры рэнтабельнасці вытворчасці такой культуры 19,8 працэнта прынесла 800 мільёнаў рублёў прыбытку.
На гэтым тыдні мне давялося пабываць на полі, дзе ўбіраў салодкія карані прадстаўнік “слаўнай кагорты” механізатараў Іван Антановіч (на здымку). Намеснік дырэктара РУСП “Масаляны” па ідэалагічнай рабоце Уладзімір Вайцюк ахарактарызаваў гэтага стараннага чалавека з самага лепшага боку.
Дынамічна развіваецца ў гаспадарцы і жывёлагадоўля. Надой на карову тут дасягнуў 7123 кілаграмаў, што на 136 кілаграмаў больш у параўнанні з аналагічным перыядам мінулага года. Нашы землякі пастаянна ўтрымліваюць лідарства сярод лепшых вытворцаў каштоўнай сыравіны ў рэспубліцы. Гатункам “экстра” тут прадалі 37 працэнтаў малака, вышэйшым гатункам – 61 працэнт. Стабільнасць і матэрыяльная зацікаўленасць у выніках сваёй працы прыцягваюць людзей у гэтую працаёмкую і няпростую галіну. Былы кандытар і прадавец Марына Лоскат (на здымку) цяпер працуе цялятніцай і выбарам сваім задаволена. Жанчына даглядае 85 цялят, яна любіць жывёлу і ставіцца да малых цялятак, як да дзяцей, а да нялёгкай справы з душой, таму і заслужыла шчырую павагу ў дружным калектыве.
У РУСП “Масаляны“ спадзяюцца, што год будзе ўдалым. Чакаецца, што выручка ўзрасце на 10 мільярдаў рублёў. Няхай спадарожнічаюць працаўнікам гаспадаркі моцнае здароўе, новыя поспехі, прыемны настрой, удача, бадзёрасць і аптымізм!
Ніна Наддэ, фота аўтара