У апошнюю нядзелю чэрвеня ў Беларусі адзначаецца Дзень моладзі – свята самай актыўнай і перспектыўнай часткі нашага грамадства. Для маладых людзей Бераставіччыны святочнае мерапрыемства з гэтай нагоды было арганізавана вечарам у суботу, 25 чэрвеня.
У гарадскім парку каля летняга амфітэатра разгарнулі сваю работу гандлёвыя кропкі, атракцыёны для дзяцей, прадстаўнікі касметычных кампаній Faberlic і Mary Kay праводзілі майстар-класы па макіяжы і дэманстравалі сваю прадукцыю, а аматары футболу арганізавалі гульню на стадыёне. Ва ўсіх жадаючых таксама была магчымасць паспрабаваць свае сілы ў ігры на гітары, згуляць у лазертаг або нават зрабіць роспіс на целе ў стылі бодзі-арт.
А для тых, хто не паспеў яшчэ падпісацца на “Бераставіцкую газету”, работнікі рэдакцыі разам з паштальёнам праводзілі Дзень падпісчыка, запрашалі выпісаць раённае выданне і атрымаць памятны падарунак.
Вядома, спякотнае надвор’е, якое ўсталявалася ў выхадныя дні, унесла свае карэктывы, і гледачоў на канцэртнай праграме было не вельмі многа, але артысты стараліся падарыць святочны настрой усім прысутным.
Канцэртную праграму падрыхтавалі работнікі культуры і ўдзельнікі аматарскай творчасці ўстаноў культуры раёна, а таксама ўдзел святочным мерапрыемстве прыняла гродзенская кавер-група “Beach Boogie Band”, якая на працягу дзвюх гадзін выконвала хіты рускага і замежнага рока.
У завяршэнне святочнага вечара маладых людзей чакала дыскатэка.
Ірына МІКЛАШ, фота аўтара
