11 чэрвеня ва ўстановах адукацыі нашага раёна прайшлі выпускныя вечары. У апошні раз у гэты дзень ужо былыя адзінаццацікласнікі пераступілі парогі сваіх навучальных устаноў у якасці вучняў, каб атрымаць атэстаты сталасці і перагарнуць апошнюю старонку свайго школьнага жыцця.
У Вялікабераставіцкай сярэдняй школе выпускны вечар пачаўся ўрачыстай лінейкай на парозе школы, у час якой выпускнікі запусцілі ў неба паветраныя шары, якія сімвалізавалі іх саміх, назаўсёды адлятаючых з роднай школы ў новае жыццё.
Затым святочнай калонай, разам з настаўнікамі і бацькамі, у суправаджэнні ўзорнага духавога ансамбля “Tutti” Бераставіцкай дзіцячай школы мастацтваў выпускнікі рушылі цэнтральнай вуліцай Вялікай Бераставіцы да раённага Дома культуры, дзе адбылася ўрачыстая цырымонія ўручэння атэстатаў аб сярэдняй адукацыі. Радасныя, трохі ўсхваляваныя, яны з гонарам дэманстравалі свае прыгожыя ўборы, выклікаючы захапленне ў жыхароў райцэнтра, якія заўсёды з цікавасцю чакаюць традыцыйнага шэсця выпускнікоў.
Цырымонія ўручэння атэстатаў сталасці ў гэтым годзе прайшла ў форме “Выпускнога экспрэса 20-15”, які спыняючыся на прыпынках “Дзяцінства”, “Школьнае жыццё”, “Настаўніцкая”, імкліва перанёс выпускнікоў у найбольш яркія моманты іх школьнага жыцця. Шмат цёплых і ўдзячных слоў прагучала ў гэты вечар у адрас настаўнікаў, бацькоў, адміністрацыі школы. У сваю чаргу яны таксама выказалі шчырыя пажаданні і словы наказу для выпускнікоў перад новай дарогай у іх жыцці.
Традыцыйна ўрачыстая частка святочнай праграмы завяршылася развітальным вальсам на плошчы гарадскога пасёлка, які сабраў шмат гледачоў з ліку жыхароў і гасцей Вялікай Бераставіцы. З захапленнем усе назіралі, як выпускнікі кружыліся ў вальсе са сваімі аднакласнікамі, а затым і бацькамі.
Цудоўны вечар завяршыўся. Наперадзе выпускнікоў чакае новае і нязведанае жыццё, шмат хваляванняў пры здачы цэнтралізаванага тэсціравання, паступленне ў вузы. Няхай усё задуманае ў іх споўніцца! У добры шлях, дарагія выпускнікі!
Ірына МІКЛАШ, фота аўтара
Воскресенье, 22.12.2024
