У мінулую пятніцу ў Слоніме адбыўся абласны фестываль-кірмаш працаўнікоў вёскі “Дажынкі-2014”. Старшыня аблвыканкама Уладзімір Краўцоў, намеснік прэм’ер-міністра Рэспублікі Беларусь Міхаіл Русы, намеснік міністра сельскай гаспадаркі і харчавання Беларусі Ігар Брыло, старшыня Гродзенскага абласнога Савета дэпутатаў Ігар Жук уручылі лепшым аграрыям вобласці заслужаныя ўзнагароды. У свяце прынялі ўдзел намеснік кіраўніка Адміністрацыі Прэзідэнта Анатоль Ліс і памочнік Прэзідэнта Рэспублікі Беларусь – галоўны інспектар па Гродзенскай вобласці Уладзімір Даманеўскі.
Дэлегацыю Бераставіцкага раёна ўзначальваў старшыня райвыканкама Антон Кулісевіч. Бераставіччына – у ліку лепшых рэгіёнаў вобласці. Пра гэта сведчыць высокая адзнака працы нашых гаспадарак і асобных работнікаў.
Слонім добра падрыхтаваўся да абласнога свята. Кардынальна абнавілася гарадская плошча. Дарэчы, да свята тут прыўрочылі адкрыццё памятнага знака «Герб горада Слоніма». Таксама ўрачыста быў адкрыты спартыўны комплекс. Падчас Дажынак па ўсім горадзе праходзілі кірмашы, шматлікія творчыя выставы і канцэрты, у тым ліку і вядомых беларускіх зорак эстрады, дэманстраваліся тэатралізаваныя прадстаўленні, былі наладжаны забаўляльныя атракцыёны.
Працаўнікі Бераставіччыны ўнеслі свой чарговы важкі ўклад у скарбонку здабыткаў рэспублікі і вобласці. У абласным спаборніцтве за дасягненне высокіх паказчыкаў на ўборцы ўраджаю збожжавых і зернебабовых культур сярод раёнаў 1 месца заняў Бераставіцкі раён. Сярод сельгасарганізацый пачэснае 2 і 3 месца занялі пасля СВК “Свіслач” Гродзенскага раёна адпаведна РУСП “Масаляны” і СВК “Алекшыцы”. Сярод вадзіцеляў на 3 месцы Іосіф Станеўскі з СВК імя Варанецкага.
На нарыхтоўцы травяных кармоў сярод раёнаў 2 месца заняў Бераставіцкі раён. А сярод сельгасарганізацый 2 і 3 месца занялі адпаведна СВК “Алекшыцы” і РУСП “Масаляны”.
Сярод спецыялістаў пераможцамі сталі галоўны аграном аграфірмы “Стары Дворац” Дзмітрый Захарчук, начальнік комплексу па вытворчасці ялавічыны СВК “Алекшыцы” Норберт Малецкі. Сярод аператараў па абслугоўванню жывёлы сельгасарганізацый у спаборніцтве перамагла аператар па вырошчванні парасят СВК імя Варанецкага Вольга Станішэўская.
Руплівая праца людзей у арганічным спалучэнні з новымі тэхналогіямі дае такі добры вынік. На Бераставіччыне працуюць сапраўды нераўнадушныя людзі. Напрыклад, галоўны аграном аграфірмы “Стары Дворац” Дзмітрый Захарчук, нягледзячы на сваю маладосць, ужо паспеў паказаць сябе з самага лепшага боку ў павышэнні культуры земляробства і нездарма атрымаў лаўры пераможцы. Гэта дапытлівы спецыяліст, які ідзе ў нагу з часам. Свае свежыя веды ён узбагачае сучаснай навуковай агранамічнай інфармацыяй з аўтарытэтных крыніц, якую знаходзіць у Інтэрнэце. Ён пабываў у многіх іншых месцах, дзе можна пераняць перадавы вопыт, цікавіцца разнастайнымі навінкамі. З Дзмітрыем вельмі цікава размаўляць, бачна, што ён сапраўдны “фанат” сваёй справы. Менавіта такія зацікаўленыя людзі – галоўнае багацце шчодрай бераставіцкай зямлі.
Можна шчыра парадавацца за нашых землякоў, занятых у аграрным сектары. Няхай спадарожнічаюць ім моцнае здароўе і новыя поспехі!
Ніна Наддэ
