Для правядзення абласнога семінара, які адбыўся нядаўна, Бераставіцкі дзяржаўны сельскагаспадарчы прафесійны ліцэй быў выбраны не выпадкова. На працягу дзясяткаў гадоў тут рыхтуюць кадры для аграрнага сектара і могуць падзяліцца з іншымі назапашаным перадавым вопытам. Для той часткі моладзі, якую не вабяць “агні вялікага горада”, а якая вы-бірае вёску, жадае цвёрда стаяць на зямлі і мець упэўненасць у заўтрашнім дні, лепшай прыступкі, чым рэальная прафесійная адукацыя, не знайсці. У многіх рэспубліках былога Савецкага Саюза такая грунтоўная падрыхтоўка была страчана, а ў Беларусі захавана. Авалодаўшы прафесійнымі навыкамі, можна працаваць у гаспадарцы, паступаць у аграрныя вышэйшыя навучальныя ўстановы, стаць фермерам. Галоўнае, што патрабуецца ад тых, хто выбраў ліцэй – сур’ёзныя адносіны да вучобы і практыкі. І тады можна быць упэўненым – майстры вытворчага навучання і педагогі прыкладуць усе намаганні, каб гэтая першая прафесійная прыступка была паспяховай. Выязджаючы ў гаспадаркі нашага раёна, мне часта даводзіцца сустракацца з перадавікамі працы, пераможцамі спаборніцтваў, механізатарамі, якія добрымі словамі і з самай шчырай удзячнасцю ўспамінаюць сваю родную навучальную ўстанову, што дала ім пуцёўку ў самастойнае жыццё і дапамагла рэалізавацца. У многіх ужо стварыліся сапраўдныя дынастыі, дзе дзеці застаюцца вернымі аграрным прафесіям, выбраным у свой час бацькамі.
У полі зроку на абласным семінары –практыкуме былі самыя розныя пытанні. У мерапрыемстве прынялі ўдзел намеснікі начальніка ўпраўлення адукацыі Гродзенскага аблвыканкама Іван Урбановіч і Алег Рахунок, начальнік аддзела прафесійна — тэхнічнай адукацыі ўпраўлення Віталій Дземчанка, галоўны спецыяліст Андрэй Сацішур, галоўны спецыяліст планава – эканамічнага сектара ўпраўлення Вольга Суворава і іншыя. Выконваючы такую важную задачу, як падрыхтоўка кадраў у ліцэях, вялікая ўвага ў вобласці надаецца таксама развіццю іх вучэбных гаспадарак. Дырэктары, кіраўнікі вучгасаў і галоўныя бухгалтары ўстаноў прафесійна – тэхнічнай адукацыі змаглі абмяняцца вопытам, пагутарыць, параіцца, каб ведаць і ўкараняць у сябе ўсё лепшае і перадавое.
Цікавым атрымалася наведванне вучэбнай гаспадаркі Бераставіцкага ліцэя. Добраўпарадкаваная тэрыторыя прываблівае адметным выглядам. Свінаферма на 300 галоў утрымліваецца ў належным стане. Цягне галінкі ў неба маладзенькі сад, расце маліна, нядаўна паблізу пасадзілі некалькі сажанцаў грэцкіх арэхаў. Паўсюдна адчуваецца людскі клопат. Ёсць і ўтульныя месцы для адпачынку, прыгожая альтанка. Госці з іншых раёнаў шчыра хвалілі такую гаспадарлівасць. На добрым прыкладзе і трэба вучыць маладую змену. Дарэчы, ад прадукцыі вучэбнай гаспадаркі ў мінулым годзе Бераставіцкі ліцэй атрымаў 331 мільён рублёў выручкі, а ў гэтым годзе тут яе плануюць павялічыць яшчэ больш. Сярэднясутачную прывагу свіней збіраюцца давесці да 520 – 530 грамаў, а ўраджайнасць збожжавых да 50 цэнтнераў з гектара. І калі так будзе, вучгас зможа не толькі сапернічаць з калегамі, але і з гаспадаркамі раёна і вобласці. Тут не спыняюцца на дасягнутым. Пасеялі азімы рапс, будуць сеяць кукурузу. Гэта дапаможа атрымліваць большую аддачу.
Дырэктарам і работнікам ліцэяў на семінары карысна было паслухаць, напрыклад, галоўнага спецыяліста планава – эканамічнага сектара ўпраўлення адукацыі аблвыканкама Вольгу Сувораву (яна расказала пра асаблівасці сучасных метадаў планавання фінансава – гаспадарчай дзейнасці вучэбных гаспадарак), а таксама іншых спецыялістаў аблвыканкама. Уздымаліся на-дзённыя актуальныя пытанні. Гутарка вялася таксама пра ўлік вытворчай дзейнасці, фарміраванне адпускных цэн на сельгаспрадукцыю ўласнай вытворчасці і іншае.
Пабываць на абласным мерапрыемстве было вельмі цікава. Такое меркаванне выказвалі ўсе, да каго я звярталася.
А завяршыць свой матэрыял мне хочацца той жа думкай, якая была ў пачатку. Хутка лета, і многія ўчарашнія школьнікі задумаюцца пра выбар прафесіі. Краіне патрэбны кадры для сельскай гаспадаркі. У сельгаскааператывах шмат робіцца для таго, каб моладзь выбірала вёску. Напрыклад, там можна атрымаць бяс-платнае жыллё – добраўпарадкаваныя асабнякі. Гэта вельмі важна для маладых сем’яў. Выбірайце Бераставіцкі ліцэй – тут вас навучаць быць сапраўднымі гаспадарамі!
На аснове базавай адукацыі можна атрымаць сярэднюю і спецыяльнасці: трактарыст – машыніст катэгорый А, В, Д, вадзіцель аўтамабіля катэгорыі С; вадзіцель аўтамабіля катэгорыі С, электрагазазваршчык 3 разраду; тынкоўшчык 3 разраду, абліцоўшчык – плітачнік 3 разраду; швачка 3 разраду, повар 3 разраду. Тэрмін навучання – 3 гады.
На аснове сярэдняй адукацыі можна вывучыцца на трактарыста – машыніста катэгорыі А, В, Д, вадзіцеля аўтамабіля катэгорыі С. Тэрмін навучання – 1 год.
Усе гэтыя запатрабаваныя спецыяльнасці прыдатныя як для вёскі, так і для горада. А калі нехта не паступіў у ВНУ пасля сярэдняй школы, дык можа не страчваць год перад наступным паступленнем, а атрымаць за гэты час добрую прафесію.
Ніна Наддэ, фота аўтара
