“Дыктатура тэхналогій”
Вясной аграрыі жывуць сяўбой, хаця і іншыя работы ў сельскай гаспадарцы таксама не менш важныя.
— Агульная плошча яравых культур у нашым раёне ў гэтым годзе складае 15708 гектараў, з іх раннія яравыя збожжавыя і зернебабовыя (без кукурузы, грэчкі і проса) зоймуць 4810 гектараў, — гаворыць начальнік аддзела арганізацыі вытворчасці ўпраўлення сельскай гаспадаркі і харчавання Бераставіцкага райвыканкама Аляксандр Курыла (на здымку). — Пад яравы ячмень адведзена 2213 гектараў, пад пшаніцу — 935 гектараў, авёс – 301 і зернебабовыя – 1361 гектараў. А кукуруза на зерне зойме 2816 гектараў, грэчка – 55 гектараў.
Нягледзячы на часовыя затрымкі з-за “капрызаў надвор’я”, сяўба на Бераставіччыне ідзе ў звычайным рэжыме з захаваннем неабходных агратэхнічных прыёмаў. У аптымальны тэрмін пасеяны раннія яравыя. Акцэнт у раслінаводстве робіцца, вобразна кажучы, “на дыктатуру тэхналогій”. Пасля ранніх яравых на чарзе цукровыя буракі, кукуруза і грэчка. Яны любяць больш цёплае надвор’е, калі добра прагрэецца глеба.
Без хлебных культур, спрадвечнай скарбонкі энергіі, сапраўды немагчыма ўявіць наша жыццё. Крупы – аснова правільнага здаровага харчавання. Пшаніцу і ячмень чалавецтва сеяла ўжо ў каменным веку. У сусветнай вытворчасці пшаніца разам з рысам і кукурузай знаходзіцца сярод лідараў. Пшаніцы зараз налічваецца каля тысячы самых разнастайных гатункаў, ёсць нават экзатычнага чырвонага колеру.
Ніна НАДДЭ, фота аўтара
