Па выніках мінулага года сярод птушкафабрык Беларусі, якія спецыялізуюцца на вытворчасці яек нашай Бераставіцкай птушкафабрыцы Міністэрствам сельскай гаспадаркі і харчавання за высокія паказчыкі ў вытворчасці прысуджана ганаровае 3 месца.
Вядома, у сённяшніх эканамічных умовах дабівацца выдатных вынікаў няпроста, ёсць шмат аб’ектыўных прычын, напрыклад, рост цэн, якія ўскладняюць паўсядзённую работу. Але і па выніках першага паўгоддзя на Бераставіцкай птушкафабрыцы ёсць чым ганарыцца. Яек тут атрымалі 18,5 мільёна, на 1 мільён 400 тысяч яек больш, а рост склаў 108 працэнтаў у параўнанні з адпаведным перыядам мінулага года. Прадуктыўнасць птушкі за 6 месяцаў дасягнула 157 яек на адну нясушку. Такія поспехі сталі заканамернымі па прычыне добрасумленнай працы людзей, добрага кармлення курэй і строгага захавання сучасных тэхналогій. Калектыў шчыра ўдзячны СВК імя Варанецкага, “Макараўцы”, “Малабераставіцкі элітгас”, РУСП “Масаляны”, якія прадаюць птушкафабрыцы збожжа, а таксама райвыканкаму за тое, што пастаянна трымае пытанне ў полі зроку і аказвае падтрымку.
Добрая нясушка пачынаецца з маленькага здаровага кураняці. Менавіта такіх птушанят, якім толькі адны суткі ад з’яўлення на свет, прывозяць у Бераставіцу на спецыяльным транспарце з птушкаплемрэпрадуктара ў Шчучыне. У цэху №6 па вырошчванні маладняку кураняты ўтрымліваюцца з двухсутачнага ўзросту да 120 дзён. Пагалоўя там змяшчаецца 68 тысяч. Даглядаюць куранят аператары Ала Баярчук, Зоя Стэльмашук, слесары Іван Руды, Сяргей Поляк і Аляксандр Цяплоў. Клапоціцца пра далікатную маладзенькую птушку ветэрынарная служба – галоўны ветурач Ірына Малашкевіч, ветурач Таццяна Суродзіна, а таксама заатэхнік па птушкагадоўлі Марына Шапавалава, брыгадзір вытворчай брыгады Людміла Сяледчык. За захаваннем тэхналогій сочыць намеснік дырэктара па вытворчасці Ларыса Кавальчук.
У першыя два тыдні куранят кормяць спецыяльным кормам. Яго заказваюць на камбікормавых заводах. Затым куранят пераводзяць на кармленне кармамі ўласнага прыгатавання. Яны рассыпныя, але птушка ўжо падрасла, падужала, есць іх ахвотна.
Магчыма, чытачам будзе цікава, ці ёсць у птушкагадоўлі такія параметры, як тэхналагічныя прывагі, напрыклад, як у буйной рагатай жывёлы? Так, адказалі мне, вага птушкі тут таксама важная, яна кантралюецца. Ад правільнага развіцця арганізму залежыць увесь далейшы цыкл яйканоскасці. А першае сваё яйка маладзенькая курачка нясе прыкладна ў 110 дзён. Калі курам 140 дзён, прадуктыўнасць іх дасягае 30 працэнтаў, і іх пераводзяць у цэх па вытворчасці яек. На птушкафабрыцы 4 асноўныя цэхі, а нясушак зараз 151 тысяча. Для іх падтрымліваецца спецыяльны мікраклімат.
Безумоўна, каб такая вытворчасць працавала, як гадзіннік, патрэбна вялікая адказнасць. Людзі разумеюць, наколькі важная іх праца. Яйкі шмат гадоў ужо ідуць на экспарт. У Расійскай Федэрацыі такая натуральная прадукцыя карыстаецца добрым попытам. За 6 месяцаў туды прададзена 8 мільёнаў 272 тысячы 800 штук яек. Гэта прынесла на рахунак птушкафабрыкі 488 тысяч 966 долараў ЗША.
А акцыянеры атрымліваюць дывідэнды. Нядаўна адбыўся чарговы сход. За 2013 год налічана 72 мільёны 949 тысяч рублёў. На адну акцыю прыходзіцца 67,422 беларускага рубля.
Ніна Наддэ
