Выдавецкая дзейнасць Бераставіцкай цэнтральнай раённай бібліятэкі займае значнае месца ў рабоце гэтай установы культуры па краязнаўству, даследаванню “белых плямаў” у гісторыі роднага краю, рэкламе паслуг і новых паступленняў. Сучасны каляровы прынтар і камп’ютарнае абсталяванне дазваляюць сёння бібліятэкарам ажыццяўляць аператыўны выпуск як друкаваных, так і электронных выданняў. Займаюцца гэтай справай супрацоўнікі аддзелаў абслугоўвання і інфармацыі, а таксама бібліятэчнага маркетынгу.
Першыя крокі ў выдавецтве былі зроблены праз выданне друкаваных зборнікаў мясцовых творцаў вершаванага слова Святланы Пракопік, Зюзанны Капіца, Міколы Барэля, Кастуся Станкевіча, Алы Лагады. Запатрабаванні часу і чытацкі попыт стымулявалі бібліятэкараў да ўкаранення і развіцця гэтага напрамку дзейнасці. За апошнія гады назапашана ўжо нямала выдавецкіх прац, якія прадстаўлены ўвазе чытацкай аўдыторыі. Сярод нядаўніх друкаваных выданняў – біябібліяграфічныя паказальнікі “Восіп Кавалеўскі” (аб знакамітым земляку-заснавальніку навуковага манголазнаўства, чыё імя носіць райбібліятэка), а таксама “Павел Кавалеўскі” і “Зінаіда Кавалеўская” з серыі “Знакамітыя нашчадкі В.М.Кавалеўскага”. Работы выстаўлены на прысвечанай славутаму земляку экспазіцыі, якая аформлена ў абанементнай зале райбібліятэкі, якая носіць яго імя. Яны, безумоўна, будуць цікавыя шырокаму колу чытачоў, тым больш, што біяграфічных звестак пра сына і ўнучку Восіпа Міхайлавіча захавалася вельмі мала. Вядома, што яны былі мастакамі, творы якіх і да сённяшняга часу экспануюцца ў вядомых музеях 
Расіі. Ды і пра самога Кавалеўскага выдадзена недастаткова літаратуры, якая, да таго ж, не перавыдавалася з 1970-га года. Па гэтай жа прычыне было зроблена і перавыданне зборнікаў вершаў “Грамы на зімоўцы” і “Тры верасні” яшчэ аднаго нашага земляка, паэта Івана Леткі.
Асобнае месца сярод выдавецкіх прац краязнаўчага характару займае “Краязнаўчы каляндар Бераставіччыны”, які рыхтуецца на падставе кнігі “Памяць” Бераставіцкага раёна, “Летапіснай хронікі Бераставіччыны”, тэматычнай папкі “Знакамітыя людзі Бераставіччыны”, фактаграфічнай картатэкі “Славутыя імёны Бераставіччыны”, энцыклапедычных выданняў Беларусі і Гродзеншчыны. Адбор юбілейных дат для календара бібліятэкары робяць у адпаведнасці са значнасцю для гісторыі, эканомікі і культуры роднага краю. Дапаможнік гэты карыстаецца папулярнасцю ў школьнікаў, студэнтаў і настаўнікаў, а таксама ў аматараў краязнаўства.
У серыі “З Бераставіччынай лёсам знітаваныя” падрыхтаваны біябібліяграфічны паказальнік “Сяргей Восіпавіч Прытыцкі”, прымеркаваны да 100-годдзя вядомага на Бераставіччыне рэвалюцыянера і падпольшчыка. Таксама ў даступнай, скарочанай форме чытачам прапаноўваецца невялікі друкаваны экскурс у гісторыю роднага куточка “Бераставіччына, любая мая…”. Істотнай дапамогай мясцовым краязнаўцам служыць бібліяграфічны паказальнік “Новая літаратура аб Бераставіцкім раёне”, які выдаецца штоквартальна. Да значных раённых мерапрыемстваў і святакавання юбілейных дат біблятэкары звычайна рыхтуюць тыя ці іншыя тэматычныя выданні. Так, запатрабаванымі можна назваць брашуры ваеннай тэматыкі, дзе ў зручнай для выстаў і экспазіцый кароткай форме падаюцца звесткі аб баявым мінулым Бераставіччыны. А да сёлетняга адкрытага фестывалю польскай культуры і побыту “Эйсмантаўскі фэст” бібліятэкары аформілі і выдалі брашуру “Сусветная мастацкая літаратура. Сучасныя польскія аўтары”.
Са з’яўленнем у райбібліятэцы медыятэкі ўзнікла і неабходнасць знаёмства чытачоў з інфармацыяй на электронных носьбітах. Так, раз у паўгоддзе рыхтуецца выпуск “Медыятэка”, дзе робіцца агляд найбольш цікавых і карысных электронных паступленняў.
Акрамя краязнаўчай інфармацыі, выдавецкая дзейнасць райбібліятэкі мае і рэкламна-прапагандысцкі характар. Супрацоўнікамі аддзела бібліятэчнага маркетынгу наладжаны выпуск інфармацыйна-рэкламных выданняў, у якіх прадстаўлены вопыт лепшых бібліятэк раёна па выніках кожнага справаздачнага года. Гэта своеасаблівы летапіс цікавых спраў райбібліятэкі і бібліятэк-філіялаў, візітная картка Бераставіцкай РЦБС усюды, дзе ўзнікае неабходнасць ярка і пераканаўча прадставіць бібліятэчную работу. Бібліятэкары філіялаў у аграгарадках таксама выкарыстоўваюць магчымасці камп’ютарнай тэхнікі ў сваёй рабоце. Выдадзеныя тэматычныя паказальнікі, брашуры і буклеты яны пастаянна дэманструюць падчас правядзення розных мерапрыемстваў і на шматлікіх выставах.
У райбібліятэцы вядзецца таксама работа па стварэнні мультымедыйных прэзентацый.
На здымках: дырэктар Бераставіцкай РЦБС Таццяна Марцішэвіч і бібліятэкар аддзела бібліятэчнага маркетынгу Наталля Багдановіч дэманструюць выдавецкія працы
Святлана Ганчарова, фота аўтара
