Навучэнцы Бераставіцкай дзіцячай школы мастацтваў прынялі ўдзел у абласным адкрытым конкурсе “Новыя імёны”. Вынікі творчых выпрабаванняў – паспяховыя. Два дыпломы лаўрэатаў III ступені прывезлі ўзорны хор “Манжэрок” і ансамбль узорнага хору “Кампанэлі”.
Конкурс “Новыя імёны” праводзіцца ўпраўленнем культуры Гродзенскага аблвыканкама і Гродзенскім дзяржаўным музычным каледжам з мэтай захавання і прымнажэння рэгіянальных традыцый выканаўчай і музычна-педагагічнай школ, садзейнічання прафесійнай арыентацыі таленавітых вучняў школ мастацтваў Гродзеншчыны. Кожны год творчыя выпрабаванні праводзяцца ў розных намінацыях: “фартэпіяна”, “струнныя смычковыя інструменты”, “духавыя і ўдарныя інструменты”, “струнныя народныя інструменты”, “баян-акардэон”. У гэтым годзе сваё майстэрства і выканаўчы ўзровень прадстаўлялі юныя вакалісты ў намінацыі “акадэмічны вакал (сольнае, ансамблевае і харавое выкананне)”.
Бераставіцкія дзіцячыя харавыя калектывы пацвердзілі свой высокі ўзровень выканальніцкага майстэрства і прафесійнай падрыхтоўкі, які быў адзначаны камісіяй яшчэ ў мінулым годзе падчас атэстацыйнага агляду на пацвярджэнне звання “ўзорны”. Конкурсная праграма малодшага хору “Манжэрок” (кіраўнік Ірына Серабракова, канцэртмайстар Галіна Архіпава) і ансамбля старшага хору “Кампанэлі” (кіраўнік Таццяна Кулік, канцэртмайстар Галіна Карпенка) вылучалася разнастайнасцю і арыгінальнасцю. Бераставіцкія юныя вакалісты прадэманстравалі членам журы ўвесь свой артыстызм, непасрэднасць і эмацыянальнасць, за што і былі прызнаны лаўрэатамі III ступені. У сольным выкананні свае сілы паспрабавала Анастасія Рыжэўская. І хоць прызавога месца Насця не заняла, выступленне юнай спявачкі было адметным і запамінальным.
Кіраўнікі бераставіцкіх ўзорных хораў Ірына Серабракова і Таццяна Кулік ўзнагароджаны Граматамі за высокае прафесійнае майстэрства і якасную падрыхтоўку вучняў да конкурсу.
Святлана Ганчарова
