На Бераставіччыне з 14 па 18 сакавіка праходзіў Тыдзень праваслаўнай кнігі. У нядзельных школах храмаў, установах адукацыі і бібліятэках раёна ў гэты перыяд адбыўся шэраг мерапрыемстваў, накіраваных на папулярызацыю праваслаўнай літаратуры сярод насельніцтва.
Дзень праваслаўнай кнігі адзначаўся 14 сакавіка. На рэспубліканскім узроўні ўрачыстасць, прысвечаная гэтай даце, адбылася 10 сакавіка ў Нацыянальнай бібліятэцы Беларусі з удзелам духавенства, прадстаўнікоў органаў улады і міністэрстваў. Сёлета яна была прымеркавана да 500-годдзя беларускага кнігадрукавання.
Арганізатарамі ўрачыстага мерапрыемства ў Мінску выступілі выдавецкі савет Беларускай Праваслаўнай Царквы, Нацыянальная бібліятэка Беларусі і Елісавецінскі жаночы манастыр. Яно пачалося з адкрыцця экспазіцыі рэдкіх выданняў Бібліі ў Музеі кнігі Нацыянальнай бібліятэкі Беларусі. Унікальны экспанат выставы – факсімільнае ўзнаўленне рукапісаў паслання апостала Пятра, датаванага III стагоддзем. На выставе таксама былі прадстаўлены выданні Бібліі XV-XX стагоддзяў з розных краін: Беларусі, Расіі, Украіны, Польшчы, Германіі і іншых. У сваім прывітальным слове мітрапаліт Мінскі і Заслаўскі Павел, Патрыяршы Экзарх усяе Беларусі, адзначыў, што кніга давала магчымасць нашым продкам пазнаваць Бога, навакольны свет і самога сябе. Яна вучыла чалавека бачыць добрае, вечнае і святое. Гэтыя ж функцыі кніга выконвае і ў сучасным свеце. Мітрапаліт Павел выказаў надзею, што дзеці і моладзь Беларусі захаваюць любоў да кнігі, нягледзячы на імклівае развіццё сучасных інфармацыйных тэхналогій.
Дырэктар Нацыянальнай бібліятэкі Раман Матульскі правёў прэзентацыю факсімільнага выдання «Кніжная спадчына Францыска Скарыны» ў дваццаці тамах. Першы том серыі быў урачыста перададзены ў бібліятэку Мінскай духоўнай акадэміі.
Да Тыдня праваслаўнай кнігі далучыліся філіялы “Пагранічная сельская бібліятэка” і “Алекшыцкая сельская бібліятэка”.
Загадчык філіяла “Пагранічная сельская бібліятэка” Надзея Кобрынец:
– У сераду, 15 сакавіка, у нас адбылася сустрэча дарослых наведвальнікаў бібліятэкі з настаяцелем храма Святой прападобнай Еўфрасінні Полацкай, протаіерэем Сергіем Шэлестам. Бацюшка прадставіў навінкі праваслаўнай літаратуры з царкоўнай бібліятэкі, а бібліятэкары раздалі ўдзельнікам сустрэчы тэматычныя буклеты “Праз кнігі – да духоўнасці” з рэкамендацыйным спісам праваслаўнай літаратуры з кніжнага фонду філіяла. У суботу, 18 сакавіка, свяшчэннік сустрэўся з маленькімі чытачамі. Дзецям былі прадэманстраваны дакументальныя фільмы праваслаўнай тэматыкі з відэатэкі мультымедыйнага цэнтра бібліятэкі. На працягу Тыдня дзейнічала выстава праваслаўнай літаратуры.
Загадчык філіяла “Алекшыцкая сельская бібліятэка” Вольга Барысевіч:
– Для чытачоў бібліятэкі дзейнічае пастаянная выстава «Духоўных кніг-чароўная мудрасць» (на здымку). У прадстаўленых на выставе кнігах можна знайсці інфармацыю, якая дапаможа праваслаўным вернікам правільна посціцца і духоўна ўдасканальвацца ў дні Вялікага посту. У аўторак пад назвай “Значэнне праваслаўнай кнігі ў жыцці чалавека” мы правялі для сваіх чытачоў агляд тэматычнай літаратуры, абмеркавалі карысць чытання праваслаўнай літаратуры для духоўнага развіцця асобы.
Святлана Ганчарова
