Бібліятэкар філіяла “Кватарская інтэграваная сельская бібліятэка” Інга Антановіч – вельмі прыемная, сціплая дзяўчына, якая пры знаёмстве адразу выклікае да сябе прыхільнасць. У Кватарах яна працуе нядаўна, усяго паўтара года. Мясцовыя чытачы сардэчна прынялі новага бібліятэкара, а самыя маленькія – дык і ўвогуле хутка пасябравалі з маладым спецыялістам. Пасля ўрокаў штодзень прыбягаюць у бібліятэку не толькі за кніжкай, але і каб проста адпачыць, з карысцю правесці свой вольны час.
У прафесію бібліятэкара Інга трапіла, можна сказаць, выпадкова. Дзяўчына скончыла Ваўкавыскі педкаледж па спецыяльнасці “турызм і гасціннасць”, год працавала выхавальнікам у Пархімаўскім яслях-садзе. А калі пачула, што ёсць вакансія ў Кватарскай бібліятэцы, вырашыла паспрабаваць свае сілы ў новай для сябе дзейнасці. І не пашкадавала.
– Работа спадабалася, – расказвае Інга, – асабліва мне цікава працаваць з дзецьмі. У нас дзейнічае інтэлектуальнае аматарскае аб’яднанне “Сусвет”, на пасяджэнні якога прыходзяць і маленькія чытачы, і старэйшыя школьнікі. Падчас такіх сустрэч мы абмяркоўваем цікавыя і пазнавальныя факты і падзеі з розных галін навукі і культуры, разважаем на актуальныя тэмы, якія хвалююць сёння грамадства, глядзім дакументальныя і мастацкія стужкі. У бібліятэцы ёсць камп’ютар і інтэрнэт, які мы актыўна выкарыстоўваем. Я бачу, што дзеткі з ахвотай наведваюць бібліятэку, і, безумоўна, вельмі задаволена, што ім тут цікава. Самыя актыўныя юныя чытачы – гэта Ангеліна Сак, Наталля Станкевіч, Лізавета Марыновіч, Данііл Макавей (на здымку), а таксама Васіліса Карач, Данііл Снайдэр, Мікіта Шаблей, Уладзімір Макавей і іншыя.
Аграгародок Кватары палюбіўся Інге, якая сама, дарэчы, з райцэнтра. Ёй прыйшліся па душы добразычлівыя, ветлівыя людзі, маляўнічыя краявіды з прыгожым будынкам былога маёнтка, у якім у свой час бываў і які намаляваў вядомы мастак Напалеон Орда. Тут усё прасякнута гісторыяй, якой, дарэчы, Інга даўно захапляецца. Дзяўчына заканчвае факультэт гісторыі, камунікацыі і турызму Гродзенскага дзяржаўнага ўніверсітэта імя Янкі Купалы па спецыяльнасці “выкладчык гісторыі і сацыяльна-гуманітарных дысцыплін”. Усё, што датычыцца краязнаўства, яе вельмі цікавіць, і гэтаму захапленню як нельга лепш спрыяе работа бібліятэкарам, перад якім сёння, акрамя шматлікіх іншых задач, стаць і задача па вывучэнні і захаванні гісторыі роднага краю.
Што датычыцца выканання сваіх непасрэдных абавязкаў, то, па словах дырэктара дзяржаўнай установы культуры “Бераставіцкая раённая бібліятэка імя В.М.Кавалеўскага” Таццяны Марцішэвіч, Інга, нягледзячы на малады ўзрост, вельмі старанны, адказны, захоплены сваёй справай работнік. У бібліятэцы стараннямі дзяўчыны заўсёды акуратна і ўтульна, выставы і кніжныя паліцы па-мастацку і з густам аформлены. З чытачамі, якіх тут 350 чалавек, малады бібліятэкар заўсёды ветлівая і тактоўная.
Акрамя Кватараў у зону абслугоўвання бібліятэкі ўваходзяць таксама вёскі Гарбачы, Паўлюшкі і Ятаўты. Чытачы там у асноўным пенсіянеры. Інга наведвае іх і добра ведае, якімі творамі парадаваць.
– Я прыношу кнігі на дом трыццаці васьмі пажылым вяскоўцам. Яны аддаюць перавагу класічным творам, сучасным раманам, а таксама літаратуры рэлігійнага зместу. Сярод жа самых актыўных чытачоў хачу назваць Ніну Канецкую, Надзею Вайцяхоўскую і Тамару Марчык з Кватараў, Надзею Афанасенка з Гарбачоў і іншых.
Інга Антановіч яшчэ толькі ў пачатку свайго працоўнага шляху. Аднак ужо цяпер можна сказаць, што яна чалавек не па гадах сур’ёзны, разважлівы, сумленны. Прафесіі бібліятэкара і гісторыка ў нечым блізкія. Што выбярэ дзяўчына – пакажа час. А пакуль хочацца пажадаць ёй спаўна рэалізаваць усе свае задумкі, знайсці сябе ў любімай справе.
Святлана Ганчарова,
фота Уладзіміра Макавея
